北緯25度

咱寶島里的里長嬸仔

文/北緯25度  圖/小時 小弘 小維 小伃  繪圖指導/Felicia


人講：「老人毋講古，少年毋捌寶。」老大人的經驗就是寶貝。咱寶島里嘛有一个寶貝，就是阮同學小虎的阿媽—咱寶島里的里長嬸仔，伊講話氣力真足，不管時攏笑頭笑面，只要逐家開喙，伊絕對鬥相共袂躊躇，里長嬸仔的話母(註1)就是：「代誌交予我就妥當啊！」所以逐家攏嘛叫伊「妥當嬸仔」。                          

(註1) uē-bó：口頭禪

「妥當嬸仔」真 gâu(註2)講故事，拜一早起伊攏會來阮學校做義工，講故事予小朋友聽。「妥當嬸仔」將故事講甲真趣味，逐擺講到精采的所在閣刁工停一下假神秘，予逐家緊張追問：「紲落來咧？紲落來咧？」逐家定定欣羨的佮小虎講：「恁阿媽講故事真好聽，你逐天攏有故事通聽真好命！」小虎嘛替阿媽感覺足驕傲。


(註2) gâu：能幹

阿土伯兩个後生攏踮美國吃頭路，平常時攏是阿土伯一个人過日子，有一擺阿土伯連紲幾工攏無出現，「妥當嬸仔」走去 厝看，才知影原來阿土伯破病踮眠床爬袂起來。「妥當嬸仔」隨拜託社區內底熱心的厝邊做伙替阿土伯將厝內摒掃清氣，閣親身送阿土伯去看醫生，這馬的阿土伯又閣是一尾活龍。

 

「妥當嬸仔」感覺健康尚重要，所以伊招逐家逐日暗飯食了，相招來去社區公園做運動，逐家那走那開講，毋但增加厝邊隔壁的感情，而且隔轉日上班上課攏足有元氣。歇睏日伊嘛常常招里民去山頂海邊四界走走，希望逐家 迌了會當定定保持好心情。 



猶閣有一擺，我佮小妹下課欲轉去，走到一半聽到溝仔蓋底傳來細聲細聲「喵喵喵」的貓仔咧唉，一揣，是一隻拄出世的貓仔摔落去溝仔內爬袂出來，趕緊走去拜託里長嬸仔想辦法，伊隨去請打火兄弟鬥跤手，一睏仔就救出一隻瘦卑巴的細隻烏貓仔，這馬「黑麻糍」已經兩歲啊，是阮家的寶貝貓。 



「妥當嬸仔」平常時尚愛佮老朋友行棋，伊講行棋不但會當訓練腦筋，逐家那行棋那開講，嘛會使幫助伊了解社區里民的需要，毋通看「妥當嬸仔」是查某人，伊行棋的技術真厲害，一點仔嘛毋輸查埔人喔！ 


「妥當嬸仔」講綠色社區予人心情快活，所以阮寶島里四界攏種滿足媠的花草。攏總一句，路燈害去揣「妥當嬸仔」穩妥當；街路無平揣「妥當嬸仔」穩妥當，咱里長嬸仔對社區大大小小攏真關心，對社區內的花花草草攏真照顧，咱寶島里有「妥當嬸仔」這個好里長，真正是萬事攏「妥當」啦！ 

封底文字：

阮的里長是查某，熱心服務真正，無論日時佮暗暝，無論好天抑歹天，萬事有伊穩妥當。 

 

 
小畫家們與我ㄧ起商量繪圖設計

閱讀延伸:小朋友創意手繪本1 : 「姐婆」

閱讀延伸:小朋友創意手繪本2: 「彩色的四季」

閱讀延伸:2009小朋友創意手繪本首獎好食个物件